1   לַמְנַצֵּ֗חַ  מִזְמֹ֥ור  לְדָוִֽד׃  עַד־  אָ֣נָה  יְ֭הוָה  תִּשְׁכָּחֵ֣נִי  נֶ֑צַח  עַד־  אָ֓נָה  תַּסְתִּ֖יר  אֶת־  פָּנֶ֣יךָ  מִמֶּֽנִּי׃  2   עַד־  אָ֨נָה  אָשִׁ֪ית  עֵצֹ֡ות  בְּנַפְשִׁ֗י  יָגֹ֣ון  בִּלְבָבִ֣י  יֹומָ֑ם  עַד־  אָ֓נָה  יָר֖וּם  אֹיְבִ֣י  עָלָֽי׃ 

3   הַבִּ֣יטָֽה  עֲ֭נֵנִי  יְהוָ֣ה  אֱלֹהָ֑י  הָאִ֥ירָה  עֵ֝ינַ֗י  פֶּן־  אִישַׁ֥ן  הַמָּֽוֶת׃  4   פֶּן־  יֹאמַ֣ר  אֹיְבִ֣י  יְכָלְתִּ֑יו  צָרַ֥י  יָ֝גִ֗ילוּ  כִּ֣י  אֶמֹּֽוט׃ 

5   וַאֲנִ֤י  בְּחַסְדְּךָ֣  בָטַחְתִּי֮  יָ֤גֵ֥ל  לִבִּ֗י  בִּֽישׁוּעָ֫תֶ֥ךָ  6   אָשִׁ֥ירָה  לַיהוָ֑ה  כִּ֖י  גָמַ֣ל  עָלָֽי׃