1   לַמְנַצֵּ֥חַ  עַֽל־  הַשְּׁמִינִ֗ית  מִזְמֹ֥ור  לְדָוִֽד׃  הֹושִׁ֣יעָה  יְ֭הוָה  כִּי־  גָמַ֣ר  חָסִ֑יד  כִּי־  פַ֥סּוּ  אֱ֝מוּנִ֗ים  מִבְּנֵ֥י  אָדָֽם׃  2   שָׁ֤וְא  יְֽדַבְּרוּ֮  אִ֤ישׁ  אֶת־  רֵ֫עֵ֥הוּ  שְׂפַ֥ת  חֲלָקֹ֑ות  בְּלֵ֖ב  וָלֵ֣ב  יְדַבֵּֽרוּ׃ 

3   יַכְרֵ֣ת  יְ֭הוָה  כָּל־  שִׂפְתֵ֣י  חֲלָקֹ֑ות  לָ֝שֹׁ֗ון  מְדַבֶּ֥רֶת  גְּדֹלֹֽות׃  4   אֲשֶׁ֤ר  אָֽמְר֨וּ  לִלְשֹׁנֵ֣נוּ  נַ֭גְבִּיר  שְׂפָתֵ֣ינוּ  אִתָּ֑נוּ  מִ֖י  אָדֹ֣ון  לָֽנוּ׃  5   מִשֹּׁ֥ד  עֲנִיִּים֮  מֵאַנְקַ֪ת  אֶבְיֹ֫ונִ֥ים  עַתָּ֣ה  אָ֭קוּם  יֹאמַ֣ר  יְהוָ֑ה  אָשִׁ֥ית  בְּ֝יֵ֗שַׁע  יָפִ֥יחַֽ  לֹֽו׃  6   אִֽמֲרֹ֣ות  יְהוָה֮  אֲמָרֹ֪ות  טְהֹ֫רֹ֥ות  כֶּ֣סֶף  צָ֭רוּף  בַּעֲלִ֣יל  לָאָ֑רֶץ  מְ֝זֻקָּ֗ק  שִׁבְעָתָֽיִם׃  7   אַתָּֽה־  יְהוָ֥ה  תִּשְׁמְרֵ֑ם  תִּצְּרֶ֓נּוּ  מִן־  הַדֹּ֖ור  ז֣וּ  לְעֹולָֽם׃  8   סָבִ֗יב  רְשָׁעִ֥ים  יִתְהַלָּכ֑וּן  כְּרֻ֥ם  זֻ֝לּ֗וּת  לִבְנֵ֥י  אָדָֽם׃