חבקוק 1

<< חבקוק 1 >>
Habakkuk 1 Hebrew Study Bible
Unto Habakkuk, complaining of the iniquity of the land,
1   הַמַּשָּׂא֙  אֲשֶׁ֣ר  חָזָ֔ה  חֲבַקּ֖וּק  הַנָּבִֽיא׃  2   עַד־  אָ֧נָה  יְהוָ֛ה  שִׁוַּ֖עְתִּי  וְלֹ֣א  תִשְׁמָ֑ע  אֶזְעַ֥ק  אֵלֶ֛יךָ  חָמָ֖ס  וְלֹ֥א  תֹושִֽׁיעַ׃  3   לָ֣מָּה  תַרְאֵ֤נִי  אָ֙וֶן֙  וְעָמָ֣ל  תַּבִּ֔יט  וְשֹׁ֥ד  וְחָמָ֖ס  לְנֶגְדִּ֑י  וַיְהִ֧י  רִ֦יב  וּמָדֹ֖ון  יִשָּֽׂא׃  4   עַל־  כֵּן֙  תָּפ֣וּג  תֹּורָ֔ה  וְלֹֽא־  יֵצֵ֥א  לָנֶ֖צַח  מִשְׁפָּ֑ט  כִּ֤י  רָשָׁע֙  מַכְתִּ֣יר  אֶת־  הַצַּדִּ֔יק  עַל־  כֵּ֛ן  יֵצֵ֥א  מִשְׁפָּ֖ט  מְעֻקָּֽל׃ 
is shown the fearful vengeance by the Chaldeans.
5   רְא֤וּ  בַגֹּויִם֙  וְֽהַבִּ֔יטוּ  וְהִֽתַּמְּה֖וּ  תְּמָ֑הוּ  כִּי־  פֹ֙עַל֙  פֹּעֵ֣ל  בִּֽימֵיכֶ֔ם  לֹ֥א  תַאֲמִ֖ינוּ  כִּ֥י  יְסֻפָּֽר׃  6   כִּֽי־  הִנְנִ֤י  מֵקִים֙  אֶת־  הַכַּשְׂדִּ֔ים  הַגֹּ֖וי  הַמַּ֣ר  וְהַנִּמְהָ֑ר  הַֽהֹולֵךְ֙  לְמֶרְחֲבֵי־  אֶ֔רֶץ  לָרֶ֖שֶׁת  מִשְׁכָּנֹ֥ות  לֹּא־  לֹֽו׃  7   אָיֹ֥ם  וְנֹורָ֖א  ה֑וּא  מִמֶּ֕נּוּ  מִשְׁפָּטֹ֥ו  וּשְׂאֵתֹ֖ו  יֵצֵֽא׃  8   וְקַלּ֨וּ  מִנְּמֵרִ֜ים  סוּסָ֗יו  וְחַדּוּ֙  מִזְּאֵ֣בֵי  עֶ֔רֶב  וּפָ֖שׁוּ  פָּֽרָשָׁ֑יו  וּפָֽרָשָׁיו֙  מֵרָחֹ֣וק  יָבֹ֔אוּ  יָעֻ֕פוּ  כְּנֶ֖שֶׁר  חָ֥שׁ  לֶאֱכֹֽול׃  9   כֻּלֹּה֙  לְחָמָ֣ס  יָבֹ֔וא  מְגַמַּ֥ת  פְּנֵיהֶ֖ם  קָדִ֑ימָה  וַיֶּאֱסֹ֥ף  כַּחֹ֖ול  שֶֽׁבִי׃  10   וְהוּא֙  בַּמְּלָכִ֣ים  יִתְקַלָּ֔ס  וְרֹזְנִ֖ים  מִשְׂחָ֣ק  לֹ֑ו  ה֚וּא  לְכָל־  מִבְצָ֣ר  יִשְׂחָ֔ק  וַיִּצְבֹּ֥ר  עָפָ֖ר  וַֽיִּלְכְּדָֽהּ׃  11   אָ֣ז  חָלַ֥ף  ר֛וּחַ  וַֽיַּעֲבֹ֖ר  וְאָשֵׁ֑ם  ז֥וּ  כֹחֹ֖ו  לֵאלֹהֹֽו׃ 
He complains that vengeance should be executed by them who are far worse.
12   הֲלֹ֧וא  אַתָּ֣ה  מִקֶּ֗דֶם  יְהוָ֧ה  אֱלֹהַ֛י  קְדֹשִׁ֖י  לֹ֣א  נָמ֑וּת  יְהוָה֙  לְמִשְׁפָּ֣ט  שַׂמְתֹּ֔ו  וְצ֖וּר  לְהֹוכִ֥יחַ  יְסַדְתֹּֽו׃  13   טְהֹ֤ור  עֵינַ֙יִם֙  מֵרְאֹ֣ות  רָ֔ע  וְהַבִּ֥יט  אֶל־  עָמָ֖ל  לֹ֣א  תוּכָ֑ל  לָ֤מָּה  תַבִּיט֙  בֹּֽוגְדִ֔ים  תַּחֲרִ֕ישׁ  בְּבַלַּ֥ע  רָשָׁ֖ע  צַדִּ֥יק  מִמֶּֽנּוּ׃  14   וַתַּעֲשֶׂ֥ה  אָדָ֖ם  כִּדְגֵ֣י  הַיָּ֑ם  כְּרֶ֖מֶשׂ  לֹא־  מֹשֵׁ֥ל  בֹּֽו׃  15   כֻּלֹּה֙  בְּחַכָּ֣ה  הֵֽעֲלָ֔ה  יְגֹרֵ֣הוּ  בְחֶרְמֹ֔ו  וְיַאַסְפֵ֖הוּ  בְּמִכְמַרְתֹּ֑ו  עַל־  כֵּ֖ן  יִשְׂמַ֥ח  וְיָגִֽיל׃  16   עַל־  כֵּן֙  יְזַבֵּ֣חַ  לְחֶרְמֹ֔ו  וִֽיקַטֵּ֖ר  לְמִכְמַרְתֹּ֑ו  כִּ֤י  בָהֵ֙מָּה֙  שָׁמֵ֣ן  חֶלְקֹ֔ו  וּמַאֲכָלֹ֖ו  בְּרִאָֽה׃  17   הַ֥עַל  כֵּ֖ן  יָרִ֣יק  חֶרְמֹ֑ו  וְתָמִ֛יד  לַהֲרֹ֥ג  גֹּויִ֖ם  לֹ֥א  יַחְמֹֽול׃  ס