תהילים 55

<< תהילים 55 >>
Psalm 55 Hebrew Study Bible
David in his prayer complains of his fearful case
1   לַמְנַצֵּ֥חַ  בִּנְגִינֹ֗ת  מַשְׂכִּ֥יל  לְדָוִֽד׃  הַאֲזִ֣ינָה  אֱ֭לֹהִים  תְּפִלָּתִ֑י  וְאַל־  תִּ֝תְעַלַּ֗ם  מִתְּחִנָּתִֽי׃  2   הַקְשִׁ֣יבָה  לִּ֣י  וַעֲנֵ֑נִי  אָרִ֖יד  בְּשִׂיחִ֣י  וְאָהִֽימָה׃  3   מִקֹּ֤ול  אֹויֵ֗ב  מִפְּנֵ֣י  עָקַ֣ת  רָשָׁ֑ע  כִּי־  יָמִ֥יטוּ  עָלַ֥י  אָ֝֗וֶן  וּבְאַ֥ף  יִשְׂטְמֽוּנִי׃  4   לִ֭בִּי  יָחִ֣יל  בְּקִרְבִּ֑י  וְאֵימֹ֥ות  מָ֝֗וֶת  נָפְל֥וּ  עָלָֽי׃  5   יִרְאָ֣ה  וָ֭רַעַד  יָ֣בֹא  בִ֑י  וַ֝תְּכַסֵּ֗נִי  פַּלָּצֽוּת׃  6   וָאֹמַ֗ר  מִֽי־  יִתֶּן־  לִּ֣י  אֵ֭בֶר  כַּיֹּונָ֗ה  אָע֥וּפָה  וְאֶשְׁכֹּֽנָה׃  7   הִ֭נֵּה  אַרְחִ֣יק  נְדֹ֑ד  אָלִ֖ין  בַּמִּדְבָּ֣ר  סֶֽלָה׃  8   אָחִ֣ישָׁה  מִפְלָ֣ט  לִ֑י  מֵר֖וּחַ  סֹעָ֣ה  מִסָּֽעַר׃ 
He prays against his enemies, of whose wickedness and treachery he complains
9   בַּלַּ֣ע  אֲ֭דֹנָי  פַּלַּ֣ג  לְשֹׁונָ֑ם  כִּֽי־  רָאִ֨יתִי  חָמָ֖ס  וְרִ֣יב  בָּעִֽיר׃  10   יֹומָ֤ם  וָלַ֗יְלָה  יְסֹובְבֻ֥הָ  עַל־  חֹומֹתֶ֑יהָ  וְאָ֖וֶן  וְעָמָ֣ל  בְּקִרְבָּֽהּ׃  11   הַוֹּ֥ות  בְּקִרְבָּ֑הּ  וְֽלֹא־  יָמִ֥ישׁ  מֵ֝רְחֹבָ֗הּ  תֹּ֣ךְ  וּמִרְמָֽה׃  12   כִּ֤י  לֹֽא־  אֹויֵ֥ב  יְחָֽרְפֵ֗נִי  וְאֶ֫שָּׂ֥א  לֹֽא־  מְ֭שַׂנְאִי  עָלַ֣י  הִגְדִּ֑יל  וְאֶסָּתֵ֥ר  מִמֶּֽנּוּ׃  13   וְאַתָּ֣ה  אֱנֹ֣ושׁ  כְּעֶרְכִּ֑י  אַ֝לּוּפִ֗י  וּמְיֻדָּֽעִי׃  14   אֲשֶׁ֣ר  יַ֭חְדָּו  נַמְתִּ֣יק  סֹ֑וד  בְּבֵ֥ית  אֱ֝לֹהִ֗ים  נְהַלֵּ֥ךְ  בְּרָֽגֶשׁ׃  15   [יַשִּׁימָוֶת  כ]  (יַשִּׁ֤י  ק)  (מָ֨וֶת  ק)  עָלֵ֗ימֹו  יֵרְד֣וּ  שְׁאֹ֣ול  חַיִּ֑ים  כִּֽי־  רָעֹ֖ות  בִּמְגוּרָ֣ם  בְּקִרְבָּֽם׃ 
He comforts himself in God's preservation oh him, and confusion of his enemies
16   אֲ֭נִי  אֶל־  אֱלֹהִ֣ים  אֶקְרָ֑א  וַ֝יהוָ֗ה  יֹושִׁיעֵֽנִי׃  17   עֶ֤רֶב  וָבֹ֣קֶר  וְ֭צָהֳרַיִם  אָשִׂ֣יחָה  וְאֶהֱמֶ֑ה  וַיִּשְׁמַ֥ע  קֹולִֽי׃  18   פָּ֘דָ֤ה  בְשָׁלֹ֣ום  נַ֭פְשִׁי  מִקֲּרָב־  לִ֑י  כִּֽי־  בְ֝רַבִּ֗ים  הָי֥וּ  עִמָּדִֽי׃  19   יִשְׁמַ֤ע  אֵ֨ל  וְֽיַעֲנֵם֮  וְיֹ֤שֵׁ֥ב  קֶ֗דֶם  סֶ֥לָה  אֲשֶׁ֤ר  אֵ֣ין  חֲלִיפֹ֣ות  לָ֑מֹו  וְלֹ֖א  יָרְא֣וּ  אֱלֹהִֽים׃  20   שָׁלַ֣ח  יָ֭דָיו  בִּשְׁלֹמָ֗יו  חִלֵּ֥ל  בְּרִיתֹֽו׃  21   חָלְק֤וּ  מַחְמָאֹ֣ת  פִּיו֮  וּֽקֲרָב־  לִ֫בֹּ֥ו  רַכּ֖וּ  דְבָרָ֥יו  מִשֶּׁ֗מֶן  וְהֵ֣מָּה  פְתִחֹֽות׃  22   הַשְׁלֵ֤ךְ  עַל־  יְהוָ֨ה  יְהָבְךָ֮  וְה֪וּא  יְכַ֫לְכְּלֶ֥ךָ  לֹא־  יִתֵּ֖ן  לְעֹולָ֥ם  מֹ֗וט  לַצַּדִּֽיק׃  23   וְאַתָּ֤ה  אֱלֹהִ֨ים  תֹּורִדֵ֬ם  לִבְאֵ֬ר  שַׁ֗חַת  אַנְשֵׁ֤י  דָמִ֣ים  וּ֭מִרְמָה  לֹא־  יֶחֱצ֣וּ  יְמֵיהֶ֑ם  וַ֝אֲנִ֗י  אֶבְטַח־  בָּֽךְ׃