1   שִׁ֖יר  מִזְמֹ֣ור  לְדָוִֽד׃  נָכֹ֣ון  לִבִּ֣י  אֱלֹהִ֑ים  אָשִׁ֥ירָה  וַ֝אֲזַמְּרָ֗ה  אַף־  כְּבֹודִֽי׃  2   ע֭וּרָֽה  הַנֵּ֥בֶל  וְכִנֹּ֗ור  אָעִ֥ירָה  שָּֽׁחַר׃  3   אֹודְךָ֖  בָעַמִּ֥ים  יְהוָ֑ה  וַ֝אֲזַמֶּרְךָ֗  בַּל־  אֻמִּֽים׃  4   כִּֽי־  גָדֹ֣ול  מֵֽעַל־  שָׁמַ֣יִם  חַסְדֶּ֑ךָ  וְֽעַד־  שְׁחָקִ֥ים  אֲמִתֶּֽךָ׃ 

5   ר֣וּמָה  עַל־  שָׁמַ֣יִם  אֱלֹהִ֑ים  וְעַ֖ל  כָּל־  הָאָ֣רֶץ  כְּבֹודֶֽךָ׃  6   לְ֭מַעַן  יֵחָלְצ֣וּן  יְדִידֶ֑יךָ  הֹושִׁ֖יעָה  יְמִֽינְךָ֣  וַעֲנֵֽנִי׃  7   אֱלֹהִ֤ים  דִּבֶּ֥ר  בְּקָדְשֹׁ֗ו  אֶעְלֹ֥זָה  אֲחַלְּקָ֥ה  שְׁכֶ֑ם  וְעֵ֖מֶק  סֻכֹּ֣ות  אֲמַדֵּֽד׃  8   לִ֤י  גִלְעָ֨ד  לִ֤י  מְנַשֶּׁ֗ה  וְ֭אֶפְרַיִם  מָעֹ֣וז  רֹאשִׁ֑י  יְ֝הוּדָ֗ה  מְחֹקְקִֽי׃  9   מֹואָ֤ב  סִ֬יר  רַחְצִ֗י  עַל־  אֱ֭דֹום  אַשְׁלִ֣יךְ  נַעֲלִ֑י  עֲלֵֽי־  פְ֝לֶ֗שֶׁת  אֶתְרֹועָֽע׃  10   מִ֣י  יֹ֭בִלֵנִי  עִ֣יר  מִבְצָ֑ר  מִ֖י  נָחַ֣נִי  עַד־  אֱדֹֽום׃ 

11   הֲלֹֽא־  אֱלֹהִ֥ים  זְנַחְתָּ֑נוּ  וְֽלֹא־  תֵצֵ֥א  אֱ֝לֹהִ֗ים  בְּצִבְאֹתֵֽינוּ׃  12   הָֽבָה־  לָּ֣נוּ  עֶזְרָ֣ת  מִצָּ֑ר  וְ֝שָׁ֗וְא  תְּשׁוּעַ֥ת  אָדָֽם׃  13   בֵּֽאלֹהִ֥ים  נַעֲשֶׂה־  חָ֑יִל  וְ֝ה֗וּא  יָב֥וּס  צָרֵֽינוּ׃