1   אַ֥שְֽׁרֵי־  הָאִ֗ישׁ  אֲשֶׁ֤ר  לֹ֥א  הָלַךְ֮  בַּעֲצַ֪ת  רְשָׁ֫עִ֥ים  וּבְדֶ֣רֶךְ  חַ֭טָּאִים  לֹ֥א  עָמָ֑ד  וּבְמֹושַׁ֥ב  לֵ֝צִ֗ים  לֹ֣א  יָשָֽׁב׃  2   כִּ֤י  אִ֥ם  בְּתֹורַ֥ת  יְהוָ֗ה  חֶ֫פְצֹ֥ו  וּֽבְתֹורָתֹ֥ו  יֶהְגֶּ֗ה  יֹומָ֥ם  וָלָֽיְלָה׃  3   וְֽהָיָ֗ה  כְּעֵץ֮  שָׁת֪וּל  עַֽל־  פַּלְגֵ֫י  מָ֥יִם  אֲשֶׁ֤ר  פִּרְיֹ֨ו  יִתֵּ֬ן  בְּעִתֹּ֗ו  וְעָלֵ֥הוּ  לֹֽא־  יִבֹּ֑ול  וְכֹ֖ל  אֲשֶׁר־  יַעֲשֶׂ֣ה  יַצְלִֽיחַ׃ 

4   לֹא־  כֵ֥ן  הָרְשָׁעִ֑ים  כִּ֥י  אִם־  כַּ֝מֹּ֗ץ  אֲ‍ֽשֶׁר־  תִּדְּפֶ֥נּוּ  רֽוּחַ׃  5   עַל־  כֵּ֤ן  לֹא־  יָקֻ֣מוּ  רְ֭שָׁעִים  בַּמִּשְׁפָּ֑ט  וְ֝חַטָּאִ֗ים  בַּעֲדַ֥ת  צַדִּיקִֽים׃  6   כִּֽי־  יֹודֵ֣עַ  יְ֭הוָה  דֶּ֣רֶךְ  צַדִּיקִ֑ים  וְדֶ֖רֶךְ  רְשָׁעִ֣ים  תֹּאבֵֽד׃