1   הֲלֹֽא־  חָכְמָ֥ה  תִקְרָ֑א  וּ֝תְבוּנָ֗ה  תִּתֵּ֥ן  קֹולָֽהּ׃  2   בְּרֹאשׁ־  מְרֹומִ֥ים  עֲלֵי־  דָ֑רֶךְ  בֵּ֖ית  נְתִיבֹ֣ות  נִצָּֽבָה׃  3   לְיַד־  שְׁעָרִ֥ים  לְפִי־  קָ֑רֶת  מְבֹ֖וא  פְתָחִ֣ים  תָּרֹֽנָּה׃  4   אֲלֵיכֶ֣ם  אִישִׁ֣ים  אֶקְרָ֑א  וְ֝קֹולִ֗י  אֶל־  בְּנֵ֥י  אָדָֽם׃  5   הָבִ֣ינוּ  פְתָאיִ֣ם  עָרְמָ֑ה  וּ֝כְסִילִ֗ים  הָבִ֥ינוּ  לֵֽב׃ 

6   מְעוּ  כִּֽי־  נְגִידִ֣ים  אֲדַבֵּ֑ר  וּמִפְתַּ֥ח  פָתַ֗י  מֵישָׁרִֽים׃  7   כִּֽי־  אֱ֭מֶת  יֶהְגֶּ֣ה  חִכִּ֑י  וְתֹועֲבַ֖ת  שְׂפָתַ֣י  רֶֽשַׁע׃  8   בְּצֶ֥דֶק  כָּל־  אִמְרֵי־  פִ֑י  אֵ֥ין  בָּ֝הֶ֗ם  נִפְתָּ֥ל  וְעִקֵּֽשׁ׃  9   כֻּלָּ֣ם  נְ֭כֹחִים  לַמֵּבִ֑ין  וִֽ֝ישָׁרִ֗ים  לְמֹ֣צְאֵי  דָֽעַת׃ 

10   קְחֽוּ־  מוּסָרִ֥י  וְאַל־  כָּ֑סֶף  וְ֝דַ֗עַת  מֵחָר֥וּץ  נִבְחָֽר׃  11   כִּֽי־  טֹובָ֣ה  חָ֭כְמָה  מִפְּנִינִ֑ים  וְכָל־  חֲ֝פָצִ֗ים  לֹ֣א  יִֽשְׁווּ־  בָֽהּ׃ 

12   אֲ‍ֽנִי־  חָ֭כְמָה  שָׁכַ֣נְתִּי  עָרְמָ֑ה  וְדַ֖עַת  מְזִמֹּ֣ות  אֶמְצָֽא׃  13   יִֽרְאַ֣ת  יְהוָה֮  שְֽׂנֹ֫את  רָ֥ע  גֵּ֘אָ֤ה  וְגָאֹ֨ון  וְדֶ֣רֶךְ  רָ֭ע  וּפִ֨י  תַהְפֻּכֹ֬ות  שָׂנֵֽאתִי׃  14   לִֽי־  עֵ֭צָה  וְתוּשִׁיָּ֑ה  אֲנִ֥י  בִ֝ינָ֗ה  לִ֣י  גְבוּרָֽה׃ 

15   בִּ֭י  מְלָכִ֣ים  יִמְלֹ֑כוּ  וְ֝רֹוזְנִ֗ים  יְחֹ֣קְקוּ  צֶֽדֶק׃  16   בִּ֭י  שָׂרִ֣ים  יָשֹׂ֑רוּ  וּ֝נְדִיבִ֗ים  כָּל־  שֹׁ֥פְטֵי  צֶֽדֶק׃  17   אֲ֭נִי  [אֹהֲבֶיהָ  כ]  (אֹהֲבַ֣י  ק)  אֵהָ֑ב  וּ֝מְשַׁחֲרַ֗י  יִמְצָאֻֽנְנִי׃ 

18   עֹֽשֶׁר־  וְכָבֹ֥וד  אִתִּ֑י  הֹ֥ון  עָ֝תֵ֗ק  וּצְדָקָֽה׃  19   טֹ֣וב  פִּ֭רְיִי  מֵחָר֣וּץ  וּמִפָּ֑ז  וּ֝תְבוּאָתִ֗י  מִכֶּ֥סֶף  נִבְחָֽר׃  20   בְּאֹֽרַח־  צְדָקָ֥ה  אֲהַלֵּ֑ך  בְּ֝תֹ֗וךְ  נְתִיבֹ֥ות  מִשְׁפָּֽט׃  21   לְהַנְחִ֖יל  אֹהֲבַ֥י  יֵ֑שׁ  וְאֹצְרֹ֖תֵיהֶ֣ם  אֲמַלֵּֽא׃  פ 

22   יְֽהוָ֗ה  קָ֭נָנִי  רֵאשִׁ֣ית  דַּרְכֹּ֑ו  קֶ֖דֶם  מִפְעָלָ֣יו  מֵאָֽז׃  23   מֵ֭עֹולָם  נִסַּ֥כְתִּי  מֵרֹ֗אשׁ  מִקַּדְמֵי־  אָֽרֶץ׃  24   בְּאֵין־  תְּהֹמֹ֥ות  חֹולָ֑לְתִּי  בְּאֵ֥ין  מַ֝עְיָנֹ֗ות  נִכְבַּדֵּי־  מָֽיִם׃  25   בְּטֶ֣רֶם  הָרִ֣ים  הָטְבָּ֑עוּ  לִפְנֵ֖י  גְבָעֹ֣ות  חֹולָֽלְתִּי׃  26   עַד־  לֹ֣א  עָ֭שָׂה  אֶ֣רֶץ  וְחוּצֹ֑ות  וְ֝רֹ֗אשׁ  עָפְרֹ֥ות  תֵּבֵֽל׃  27   בַּהֲכִינֹ֣ו  מַיִם  שָׁ֣ם  אָ֑נִי  בְּח֥וּקֹו  ח֝֗וּג  עַל־  פְּנֵ֥י  תְהֹֽום׃  28   בְּאַמְּצֹ֣ו  שְׁחָקִ֣ים  מִמָּ֑עַל  בַּ֝עֲזֹ֗וז  עִינֹ֥ות  תְּהֹום  29   בְּשׂ֘וּמֹ֤ו  לַיָּ֨ם  חֻקֹּ֗ו  וּ֭מַיִם  לֹ֣א  יַֽעַבְרוּ־  פִ֑יו  בְּ֝חוּקֹ֗ו  מֹ֣וסְדֵי  אָֽרֶץ׃  30   וָֽאֶהְיֶ֥ה  אֶצְלֹ֗ו  אָ֫מֹ֥ון  וָֽאֶהְיֶ֣ה  עֲשֻׁעִים  יֹ֤ום  יֹ֑ום  מְשַׂחֶ֖קֶת  לְפָנָ֣יו  בְּכָל־  עֵֽת׃  31   מְ֭שַׂחֶקֶת  בְּתֵבֵ֣ל  אַרְצֹ֑ו  וְ֝שַׁעֲשֻׁעַ֗י  אֶת־  בְּנֵ֥י  אָדָֽם׃  פ 

32   וְעַתָּ֣ה  בָ֭נִים  שִׁמְעוּ־  לִ֑י  וְ֝אַשְׁרֵ֗י  דְּרָכַ֥י  יִשְׁמֹֽרוּ׃  33   שִׁמְע֖וּ  מוּסָ֥ר  וַחֲכָ֗מוּ  וְאַל־  תִּפְרָֽעוּ׃  34   אַ֥שְֽׁרֵי  אָדָם֮  שֹׁמֵ֪עַֽ֫  לִ֥י  לִשְׁקֹ֣ד  עַל־  דַּ֭לְתֹתַי  יֹ֤ום  יֹ֑ום  לִ֝שְׁמֹ֗ר  מְזוּזֹ֥ת  פְּתָחָֽי׃  35   כִּ֣י  מֹ֭צְאִי  [מֹצְאֵי  כ]  (מָצָ֣א  ק)  חַיִּ֑ים  וַיָּ֥פֶק  רָ֝צֹ֗ון  מֵיְהוָֽה׃  36   וְֽ֭חֹטְאִי  חֹמֵ֣ס  נַפְשֹׁ֑ו  כָּל־  מְ֝שַׂנְאַ֗י  אָ֣הֲבוּ  מָֽוֶת׃  פ