איוב 32

<< איוב 32 >>
Job 32 Hebrew Study Bible
Elihu is angry with Job and his three friends
1   וַֽיִּשְׁבְּת֡וּ  שְׁלֹ֤שֶׁת  הָאֲנָשִׁ֣ים  הָ֭אֵלֶּה  מֵעֲנֹ֣ות  אֶת־  אִיֹּ֑וב  כִּ֤י  ה֖וּא  צַדִּ֣יק  בְּעֵינָֽיו׃  פ  2   וַיִּ֤חַר  אַ֨ף  אֱלִיה֣וּא  בֶן־  בַּרַכְאֵ֣ל  הַבּוּזִי֮  מִמִּשְׁפַּ֪חַ֫ת  רָ֥ם  בְּ֭אִיֹּוב  חָרָ֣ה  אַפֹּ֑ו  עַֽל־  צַדְּקֹ֥ו  נַ֝פְשֹׁ֗ו  מֵאֱלֹהִֽים׃  3   וּבִשְׁלֹ֣שֶׁת  רֵעָיו֮  חָרָ֪ה  אַ֫פֹּ֥ו  עַ֤ל  אֲשֶׁ֣ר  לֹא־  מָצְא֣וּ  מַעֲנֶ֑ה  וַ֝יַּרְשִׁ֗יעוּ  אֶת־  אִיֹּֽוב׃  4   וֶֽאֱלִיה֗וּ  חִכָּ֣ה  אֶת־  אִ֭יֹּוב  בִּדְבָרִ֑ים  כִּ֤י  זְֽקֵנִים־  הֵ֖מָּה  מִמֶּ֣נּוּ  לְיָמִֽים׃  5   וַיַּ֤רְא  אֱלִיה֗וּא  כִּ֘י  אֵ֤ין  מַעֲנֶ֗ה  בְּ֭פִי  שְׁלֹ֥שֶׁת  הָאֲנָשִׁ֗ים  וַיִּ֥חַר  אַפֹּֽו׃  פ 
Because wisdom comes not from age, he excuses the boldness of his youth
6   וַיַּ֤עַן  אֱלִיה֖וּא  בֶן־  בַּֽרַכְאֵ֥ל  הַבּוּזִ֗י  וַיֹּ֫אמַ֥ר  צָ֘עִ֤יר  אֲנִ֣י  לְ֭יָמִים  וְאַתֶּ֣ם  יְשִׁישִׁ֑ים  עַל־  כֵּ֖ן  זָחַ֥לְתִּי  וָֽאִירָ֓א  מֵחַוֹּ֖ת  דֵּעִ֣י  אֶתְכֶֽם׃  7   אָ֭מַרְתִּי  יָמִ֣ים  יְדַבֵּ֑רוּ  וְרֹ֥ב  נִ֗ים  יֹדִ֥יעוּ  חָכְמָֽה׃  8   אָ֭כֵן  רֽוּחַ־  הִ֣יא  בֶאֱנֹ֑ושׁ  וְנִשְׁמַ֖ת  שַׁדַּ֣י  תְּבִינֵֽם׃  9   לֹֽא־  רַבִּ֥ים  יֶחְכָּ֑מוּ  וּ֝זְקֵנִ֗ים  יָבִ֥ינוּ  מִשְׁפָּֽט׃  10   לָכֵ֣ן  אָ֭מַרְתִּי  שִׁמְעָה־  לִּ֑י  אֲחַוֶּ֖ה  דֵּעִ֣י  אַף־  אָֽנִי׃ 
He reproves them for not satisfying Job
11   הֵ֤ן  הֹוחַ֨לְתִּי  לְֽדִבְרֵיכֶ֗ם  אָ֭זִין  עַד־  תְּב֥וּנֹֽתֵיכֶ֑ם  עַֽד־  תַּחְקְר֥וּן  מִלִּֽין׃  12   וְעָֽדֵיכֶ֗ם  אֶתְבֹּ֫ונָ֥ן  וְהִנֵּ֤ה  אֵ֣ין  לְאִיֹּ֣וב  מֹוכִ֑יחַ  עֹונֶ֖ה  אֲמָרָ֣יו  מִכֶּֽם׃  13   פֶּן־  תֹּ֣֭אמְרוּ  מָצָ֣אנוּ  חָכְמָ֑ה  אֵ֖ל  יִדְּפֶ֣נּוּ  לֹא־  אִֽישׁ׃  14   וְלֹא־  עָרַ֣ךְ  אֵלַ֣י  מִלִּ֑ין  וּ֝בְאִמְרֵיכֶ֗ם  לֹ֣א  אֲשִׁיבֶֽנּוּ׃  15   חַ֭תּוּ  לֹא־  עָ֣נוּ  עֹ֑וד  הֶעְתִּ֖יקוּ  מֵהֶ֣ם  מִלִּֽים׃ 
His zeal to speak
16   וְ֭הֹוחַלְתִּי  כִּי־  לֹ֣א  יְדַבֵּ֑רוּ  כִּ֥י  עָ֝מְד֗וּ  לֹא־  עָ֥נוּ  עֹֽוד׃  17   אַעֲנֶ֣ה  אַף־  אֲנִ֣י  חֶלְקִ֑י  אֲחַוֶּ֖ה  דֵעִ֣י  אַף־  אָֽנִי׃  18   כִּ֭י  מָלֵ֣תִי  מִלִּ֑ים  הֱ֝צִיקַ֗תְנִי  ר֣וּחַ  בִּטְנִֽי׃  19   הִנֵּֽה־  בִטְנִ֗י  כְּיַ֥יִן  לֹא־  יִפָּתֵ֑חַ  כְּאֹבֹ֥ות  חֲ֝דָשִׁ֗ים  יִבָּקֵֽעַ׃  20   אֲדַבְּרָ֥ה  וְיִֽרְוַֽח־  לִ֑י  אֶפְתַּ֖ח  שְׂפָתַ֣י  וְאֶֽעֱנֶֽה׃  21   אַל־  נָ֭א  אֶשָּׂ֣א  פְנֵי־  אִ֑ישׁ  וְאֶל־  אָ֝דָ֗ם  לֹ֣א  אֲכַנֶּֽה׃  22   כִּ֤י  לֹ֣א  יָדַ֣עְתִּי  אֲכַנֶּ֑ה  כִּ֝מְעַ֗ט  יִשָּׂאֵ֥נִי  עֹשֵֽׂנִי׃