1   וַיֹּ֨אמֶר  יְהוָ֜ה  אֵלַ֗י  עֹ֚וד  לֵ֣ךְ  אֱ‍ֽהַב־  אִשָּׁ֔ה  אֲהֻ֥בַת  רֵ֖עַ  וּמְנָאָ֑פֶת  כְּאַהֲבַ֤ת  יְהוָה֙  אֶת־  בְּנֵ֣י  יִשְׂרָאֵ֔ל  וְהֵ֗ם  פֹּנִים֙  אֶל־  אֱלֹהִ֣ים  אֲחֵרִ֔ים  וְאֹהֲבֵ֖י  אֲשִׁישֵׁ֥י  עֲנָבִֽים׃ 

2   וָאֶכְּרֶ֣הָ  לִּ֔י  בַּחֲמִשָּׁ֥ה  עָשָׂ֖ר  כָּ֑סֶף  וְחֹ֥מֶר  שְׂעֹרִ֖ים  וְלֵ֥תֶךְ  שְׂעֹרִֽים׃  3   וָאֹמַ֣ר  אֵלֶ֗יהָ  יָמִ֤ים  רַבִּים֙  תֵּ֣שְׁבִי  לִ֔י  לֹ֣א  תִזְנִ֔י  וְלֹ֥א  תִֽהְיִ֖י  לְאִ֑ישׁ  וְגַם־  אֲנִ֖י  אֵלָֽיִךְ׃ 

4   כִּ֣י  יָמִ֣ים  רַבִּ֗ים  יֵֽשְׁבוּ֙  בְּנֵ֣י  יִשְׂרָאֵ֔ל  אֵ֥ין  מֶ֙לֶךְ֙  וְאֵ֣ין  שָׂ֔ר  וְאֵ֥ין  זֶ֖בַח  וְאֵ֣ין  מַצֵּבָ֑ה  וְאֵ֥ין  אֵפֹ֖וד  וּתְרָפִֽים׃  5   אַחַ֗ר  יָשֻׁ֙בוּ֙  בְּנֵ֣י  יִשְׂרָאֵ֔ל  וּבִקְשׁוּ֙  אֶת־  יְהוָ֣ה  אֱלֹהֵיהֶ֔ם  וְאֵ֖ת  דָּוִ֣ד  מַלְכָּ֑ם  וּפָחֲד֧וּ  אֶל־  יְהוָ֛ה  וְאֶל־  טוּבֹ֖ו  בְּאַחֲרִ֥ית  הַיָּמִֽים׃  פ