1   וַ֠יִּשְׁלַח  [חִירָם  כ]  (חוּרָ֨ם  ק)  מֶֽלֶךְ־  צֹ֥ר  מַלְאָכִים֮  אֶל־  דָּוִיד֒  וַעֲצֵ֣י  אֲרָזִ֔ים  וְחָרָשֵׁ֣י  קִ֔יר  וְחָרָשֵׁ֖י  עֵצִ֑ים  לִבְנֹ֥ות  לֹ֖ו  בָּֽיִת׃ 

2   וַיֵּ֣דַע  דָּוִ֔יד  כִּֽי־  הֱכִינֹ֧ו  יְהוָ֛ה  לְמֶ֖לֶךְ  עַל־  יִשְׂרָאֵ֑ל  כִּֽי־  נִשֵּׂ֤את  לְמַ֙עְלָה֙  מַלְכוּתֹ֔ו  בַּעֲב֖וּר  עַמֹּ֥ו  יִשְׂרָאֵֽל׃  פ  3   וַיִּקַּ֨ח  דָּוִ֥יד  עֹ֛וד  נָשִׁ֖ים  בִּירוּשָׁלִָ֑ם  וַיֹּ֧ולֶד  דָּוִ֛יד  עֹ֖וד  בָּנִ֥ים  וּבָנֹֽות׃  4   וְאֵ֙לֶּה֙  שְׁמֹ֣ות  הַיְלוּדִ֔ים  אֲשֶׁ֥ר  הָיוּ־  לֹ֖ו  בִּירוּשָׁלִָ֑ם  שַׁמּ֣וּעַ  וְשֹׁובָ֔ב  נָתָ֖ן  וּשְׁלֹמֹֽה׃  5   וְיִבְחָ֥ר  וֶאֱלִישׁ֖וּעַ  וְאֶלְפָּֽלֶט׃  6   וְנֹ֥גַהּ  וְנֶ֖פֶג  וְיָפִֽיעַ׃  7   וֶאֱלִישָׁמָ֥ע  וּבְעֶלְיָדָ֖ע  וֶאֱלִיפָֽלֶט׃ 

8   וַיִּשְׁמְע֣וּ  פְלִשְׁתִּ֗ים  כִּי־  נִמְשַׁ֨ח  דָּוִ֤יד  לְמֶ֙לֶךְ֙  עַל־  כָּל־  יִשְׂרָאֵ֔ל  וַיַּעֲל֥וּ  כָל־  פְּלִשְׁתִּ֖ים  לְבַקֵּ֣שׁ  אֶת־  דָּוִ֑יד  וַיִּשְׁמַ֣ע  דָּוִ֔יד  וַיֵּצֵ֖א  לִפְנֵיהֶֽם׃  9   וּפְלִשְׁתִּ֖ים  בָּ֑אוּ  וַֽיִּפְשְׁט֖וּ  בְּעֵ֥מֶק  רְפָאִֽים׃  10   וַיִּשְׁאַ֨ל  דָּוִ֤יד  בֵּאלֹהִים֙  לֵאמֹ֔ר  הַאֶֽעֱלֶה֙  עַל־  [פְּלִשְׁתִּיִּים  כ]  (פְּלִשְׁתִּ֔ים  ק)  וּנְתַתָּ֖ם  בְּיָדִ֑י  וַיֹּ֨אמֶר  לֹ֤ו  יְהוָה֙  עֲלֵ֔ה  וּנְתַתִּ֖ים  בְּיָדֶֽךָ׃  11   וַיַּעֲל֥וּ  בְּבַֽעַל־  פְּרָצִים֮  וַיַּכֵּ֣ם  שָׁ֣ם  דָּוִיד֒  וַיֹּ֣אמֶר  דָּוִ֔יד  פָּרַ֨ץ  הָֽאֱלֹהִ֧ים  אֶת־  אֹויְבַ֛י  בְּיָדִ֖י  כְּפֶ֣רֶץ  מָ֑יִם  עַל־  כֵּ֗ן  קָֽרְא֛וּ  שֵֽׁם־  הַמָּקֹ֥ום  הַה֖וּא  בַּ֥עַל  פְּרָצִֽים׃  12   וַיַּעַזְבוּ־  שָׁ֖ם  אֶת־  אֱלֹֽהֵיהֶ֑ם  וַיֹּ֣אמֶר  דָּוִ֔יד  וַיִּשָּׂרְפ֖וּ  בָּאֵֽשׁ׃  פ  13   וַיֹּסִ֤יפוּ  עֹוד֙  פְּלִשְׁתִּ֔ים  וַֽיִּפְשְׁט֖וּ  בָּעֵֽמֶק׃  14   וַיִּשְׁאַ֨ל  עֹ֤וד  דָּוִיד֙  בֵּֽאלֹהִ֔ים  וַיֹּ֤אמֶר  לֹו֙  הָֽאֱלֹהִ֔ים  לֹ֥א  תַֽעֲלֶ֖ה  אַֽחֲרֵיהֶ֑ם  הָסֵב֙  מֵֽעֲלֵיהֶ֔ם  וּבָ֥אתָ  לָהֶ֖ם  מִמּ֥וּל  הַבְּכָאִֽים׃  15   וִ֠יהִי  כְּֽשָׁמְעֲךָ֞  אֶת־  קֹ֤ול  הַצְּעָדָה֙  בְּרָאשֵׁ֣י  הַבְּכָאִ֔ים  אָ֖ז  תֵּצֵ֣א  בַמִּלְחָמָ֑ה  כִּֽי־  יָצָ֤א  הָֽאֱלֹהִים֙  לְפָנֶ֔יךָ  לְהַכֹּ֖ות  אֶת־  מַחֲנֵ֥ה  פְלִשְׁתִּֽים׃  16   וַיַּ֣עַשׂ  דָּוִ֔יד  כַּֽאֲשֶׁ֥ר  צִוָּ֖הוּ  הָֽאֱלֹהִ֑ים  וַיַּכּוּ֙  אֶת־  מַחֲנֵ֣ה  פְלִשְׁתִּ֔ים  מִגִּבְעֹ֖ון  וְעַד־  גָּֽזְרָה׃  17   וַיֵּצֵ֥א  שֵׁם־  דָּוִ֖יד  בְּכָל־  הָֽאֲרָצֹ֑ות  וַֽיהוָ֛ה  נָתַ֥ן  אֶת־  פַּחְדֹּ֖ו  עַל־  כָּל־  הַגֹּויִֽם׃